Nopal kaktusa oinarri duen proiektua orientazio jarduera berritzailearen eredutzat hartua izan da
Irun, 2025eko martxoaren 28a. Plaiaundi Lanbide Heziketako Ikastetxe Integratua Dualiza-Orienta 2024-2025 deialdian hautatua izan da, CaixaBank Dualiza eta FPEmpresa Lanbide Heziketako Ikastetxeen Elkarteak sustatutako ekimenean. Proiektua nopal kaktusa oinarri hartuta diseinatu da, eta orientazio jarduera berritzailea eskaintzen du STEAM (Zientzia, Teknologia, Ingeniaritza, Artea eta Matematika) ikuspegi batetik.
Ekimenaren bidez, Lehen Hezkuntzako 5. mailako eta DBHko 3. eta 4. mailako ikasleek tailer esperimentalen bidez parte hartuko dute jardueretan. Jarduerok zientziarekin, kosmetika naturalarekin, ingurumen jasangarritasunarekin eta errealitate birtualarekin lotuta egongo dira. Gainera, genero-ikuspegia barne hartzen da, STEAM arloetan emakumeen parte-hartze aktiboa sustatzeko.
Proiektua lankidetzan garatuko da Irungo Lekaenea eta Toki Alai ikastetxeekin, ikasleek esperientzia praktikoak bizi ditzaten eta Lanbide Heziketaren balioa lehen eskutik ezagutu dezaten. Plaiaundi LHIIko Farmaziako eta Parafarmaziako ikasleek bideo bat sortuko dute eta tailerretan parte hartuko dute mentore modura.
Ekitaldi irekia apirilaren 11n
Proiektuaren amaieran, 2025eko apirilaren 11n, 10:00etan, CIFP Plaiaundin ekitaldi ireki bat egingo da. Bertan, tailerretan planteatutako erronkaren emaitza diren ikasleen lanak aurkeztuko dira. Sari banaketa bat egingo da, eta sektore farmazeutikoko profesionalak izango dira bertan, baita bio-kosmetikako aditu bat ere, bere esperientzia partekatuz bertaratuekin. Familiak eta hezkuntza-komunitatea gonbidatuta daude proiektua ezagutzera eta gure Lanbide Heziketako eredura hurbiltzera.
Plaiaundi LHIItik gure eskerrik beroenak eman nahi dizkiegu proiektuan lagundu duten guztiei. Proiektu hau jasangarritasunarekin, berrikuntzarekin eta eragin sozialarekin konprometitutako Lanbide Heziketa baten aldeko urrats bat gehiago da.
Argitalpen honetan jasotako iritziak eta dokumentuak egileen erantzukizun esklusiboa dira, eta ez dute zertan bat etorri proiektuari laguntza ekonomikoa eman dioten erakundeen iritziarekin.
CaixaBank Dualiza eta FPEmpresa elkartearen laguntzarekin.
